بهيج انګليسي- پښتو سيند

Posted by & filed under .

Danishpress books

ځانګړنې:
د کتاب نوم:  بهيج انګليسي- پښتو سيند
ليكوال:   دوكتور عبدالحميد بهيج
خپرندوى:  دانش خپرندويه ټولنه
چاپكال:   ۱۳۸۷ل/ ۲۰۰۸ز
چاپشمېر:  ۲۰۰۰ ټوكه
كمپوزر:   مجيب الله مطيع
مخونه:   ۱۳۱۵



 


 








د خپروندويې ټولنې يادښت


ډاکتر بهيج دا ډېره موده په يواځې ځان د  سيند کښنې درانه او اکاډميک کار ته مټې رانغښتې دي او تر اوسه يې څو علمي او مسلکي سيندونه کښلي، چې دانش خپرندويې ټولنې وخت پر وخت ستاسو درنو لوستونکيو تر لاسو در رسولي.
د ښاغلي ډاکتر بهيج لوى سيند “بهيج طبي سيند” و، چې موږ په لومړي ځل خپور کړ او د طب په برخه کې يې د پام وړ هرکلى وشو. دغه راز يې سياسي او فلسفي سيندونه هم پخپلو برخو کې د لومړي لاس کارونه دي.
دانش خپرندويې ټولنې په دې وروستيو کې د ښاغلي بهيج په زيار پښتو- انګليسي سيند چاپ ته چمتو او خپور کړ، چې دادى اوس د سيند خپرونې د لړۍ په يوه بله معياري کړۍ کې (بهيج انګليسي- پښتو سيند) تاسو درنو لوستونکيو ته در ډالۍ کوي.
ډاکتر بهيج زموږ د ځوان ادبي پښت له هغو هڅاندو او مستعدو ليکوالو څخه دى، چې تل يې خپله مادي او معنوي شتمني د خپلې غريبې پښتو په ځولۍ کې ور اچولې. هغه لا په همدې لومړيو کې اړين او د پاموړ کارونه کړي دي. موږ هيله لرو، چې پښتانه او د علم قدردان به د سيند کښنې په برخه کې د ښاغلي بهيج کړي کارونه نه هېروي.
په پښتو ژبه کې د انګليسي- پښتو سيند خپرول کومه نوې خبره نه ده -د درنو لوستونکيو به په ياد وي، چې د ښاغلي بهيج له دغه اوسني سينده وړاندې موږ اويا زره وييز سيند د رڼا کولتوري مرکز په مرسته خپور کړى و، چې هغه هم د خپل وخت د لومړنيو سيندونو په کتار کې راته- خو د ډاکتر بهيج دا اوسنۍ سيند داسې ځانګړنې لري، چې موږ يې ددې سيند پر ارځښت او د خپراوي پر اړتيا قايل کړي يو. د بېلګې په توګه:
– اوسنى بهيج انګليسي- پښتو سيند په ګڼو علمي او مسلکي برخو کې نژدې يو نيم لک (١٥٠٠٠٠) وييونه (لغات) لري، چې دومره وييونه د پخوانيو سيندونو په څپو کې نه وو بهېدلي.
– د لغتونو پر ګرامري اړخ، وينګ، څپو او نورو اړخونو هم رڼا اچول شوې ده.
– د لغت کارونې بېلګې لري، چې نورې ماناوې يې هم رڼې شي.
– د لغتونو آر ريښې، د کارونې ځاى، له مسلکي برخو سره تړاو او مجازي ماناګانې نورې هغه ځانګړنې دي، چې دا سيند له نورو هغو جلا کوي.

دانش خپرندويه ټولنه، چې د ګټورو آثارو خپرېدنه او تر تاسو درنو لوستونکيو يې در رسونه لويه موخه ده، وياړي، چې يو ځل بيا له تاسو سره د يوه ښکلي، علمي او معياري (انګليسي- پښتو) سيند پر غاړه مخامخېږي. هيله ده، چې د انګليسي ژبې د تږيو تنده به خړوب کړي.
د ډېرې خواشينۍ ځاى دى، چې د دانش خپرندويې ټولنې پخواني خپاره کړي سيندونه په کندهار کې د يو څو غلو له خوا په پټه په ډېر ټيټ څرنګوالي چاپ او خپاره شوي ول، چې وروسته يې دغه ناوړه چار زموږ د ملګريو له خوا رسوا شو.
دغه ناوړه کار زموږ د سيند خپرونې يون له يو څه ځنډ و خنډ سره مخ کړ او د “بهيج انګليسي- پښتو سيند” د ژر نه چاپېدنګ تر ټولو غټ لامل هم همدغه و.
دانش خپرندويه ټولنه په پاى کې ښاغلي ډاکتر بهيج ته د برياليتوب او لا نورو ډېرو علمي کارونو لپاره د دعا لاسونه لپه کوي، هغه ځوانان هم دده پر لاره تګ ته هڅوي، چې يواځې او يواځې په خبرو د خپلې ژبې او فرهنګ د سيالۍ خوبونه ويني!


درنښت
دانش خپرندويه ټولنه